Në mesin e viktimave në tragjedinë e autobusit nga Maqedonia e Veriut që ndodhi sot në Bullgari, janë edhe katër qytetarë nga Dibra.

Kjo është bërë e ditur nga faqja qyteti i Dibrës.

“46 shpirtërat, ndër to 4 dibranë, që morën rrugën për të shijuar kënaqësinë e një fundjave, sot nuk u kthyen më pranë familjeve të tyre , por si dëshmorë i dhuruan shpirtin Zotit të Gjithësisë. Ngushëllime për të gjithë familjarët e viktimave, ndërsa të ndjerët qofshin nën mëshirën e Zoti!”, shkruan në faqen Qyteti i Dibrës.

Të paktën 45 persona, shumica shqiptarë nga Maqedonia e Veriut, kanë gjetur vdekjen në rrethana tragjike në orët e para të mëngjesit të sotëm, pasi një autobus është përfshirë nga flakët në një autostradë në perëndim të Bullgarisë.

Në mesin e viktimave të aksidentit të sotëm ka edhe fëmijë. Shtatë të mbijetuar po trajtohen ndërkohë në spitalin e kryeqytetit bullgar, Sofje, si pasojë e djegieve, ka thënë Nikolai Nikolov nga Ministria e Brendshme e Bullgarisë për televizionin BTV.